2011年5月31日星期二

失憶

今日於$7.8買入一注中國南車。

今日喺網上銀行set 買盤嘅時候發現自己原來喺5月18日買入少量利邦,但自己完全冇印象!到今日發現嘅時候佢已經經歷咗早排嘅洗倉潮。雖然佢今日升番上$7.7,但都較我嘅買入價跌咗7%。會觀察多兩日再決定佢嘅去留。

恆指今日終於突破,以900億大成交升近500點,好多之前俾洗倉嘅股票都又像樣嘅反彈。保利協鑫大成交升至$4.1,可能係開始走出深切治療部嘅開始。三江化工大升6%。自己一度想於$3入市嘅卡姆丹克大近10%,會考慮聽日追入。

理文今日先升後跌,曾跌至$10.04但有V 型反彈上$10.2。如果明日繼續下跌會考慮買入。

北控水務升2%, 成交一般,繼續觀察幾時加注。

重慶機電今日上落好細, 可能要悶一段時間。如果佢跌至$2.5樓下會考慮加注。

今日組合回報升1.4%

2011年5月30日星期一

2011-05-30

今日及上星期五都無操作。

恆指微升, 成交繼續縮減至500億左右。但觀察名單上同自己嘅持普遍上升,幅度亦唔細。

重慶機電今日升超過3.6%,但北控水務連升多日後今日稍為下跌0.5%。兩者都繼續持有。

理文大升3.5%至$10.3以上。近日嘅成交雖細但亦有向上嘅跡象。希望佢回到$10水平先入貨。

太陽能股方面,保利協鑫反彈超過4.7%但仍然冇力上$4,暫時繼續持有。卡姆丹克只係升1.5%,會再睇定啲,希望$3左右入貨。

百貨股上星期被洗後今日反彈,銀泰更挑戰高位。雖然早前避險沽出,現價更高過沽出價一截,又係因為自己學藝未精,冇得怨。

華潤水泥持有至今,又從洗倉潮中回復過來,而家又微利,繼續持有。

組合回報今日升1.4%

2011年5月26日星期四

2011-05-26

今日冇任何操作。

港股今日跟美國上升,但成交仍然少於600億。好多股票都有反彈,密切觀察中嘅理文今日再上1%左右,成交雖然較上日略大但個人仍然不足,暫不急於買入。

太陽能股沽壓未清,單晶硅龍頭之一嘅卡姆丹克仍然下跌,而家去都$3水平。有報導認為歐洲方面嘅太陽能政策將會利好接近用戶端嘅公司,我自己會睇定少少。而我亦冇研究卡姆丹克嘅產品喺國外嘅普及程度,所以暫時唔會大舉買入。但技術上佢已經跌咗好doh,$3樓下係一個幾吸引嘅水平。將會小注買入。

大笨象匯豐今日上返$80, 但經同事提醒,日線圖上原來營造緊頭肩頂。如果頭肩頂成立,都會有一定幅度嘅下跌,亦可能影響成個市嘅氣芬。所以都係睇定啲,唔好急於入市。

組合回報今日微跌0.2%。

2011年5月25日星期三

2011-05-25

今日無任何操作。

保利協鑫升少少跌多多, 都唔知想跌到幾時。今日又再大插6%,睇黎都要為手上剩餘嘅貨黎一個了斷。

三江化工都不遑多讓,今日都跌超過3%。

太陽能股除保利協鑫外,卡姆丹克繼續俾洗, 今日再跌6%。可能仲未到底,唔好心急撈底住。

理文今日冇跌穿50天線,今日上返$9.7, 但成交非常細,再觀察下先決定幾時買入。可能佢要橫行多幾日。

重慶機電今日升1.6%,成交略少, 持股冇增減。

組合回報下跌2%。

posted from Bloggeroid

2011年5月24日星期二

心態嘅轉變

自從上星期沽出7-8成嘅持貨後,無乜貨在手嘅心態同滿手股票嘅時候係有啲分別。呢幾日睇番各位cup sir 等高手嘅操作,發覺自己根本控制唔到滿手嘅貨。心態上同技術上都去唔到嗰種水平, 時間上因為要工作關係,亦唔能夠全副心機睇市。當個市有乜風吹草動時難免要跟其他人嘅操作而缺少咗自己嘅判斷。

而家持貨大幅減少,持有嘅暫時會俾佢地自由發展。回籠嘅資今而家開始慢慢入貨。而家仍然會留意cup sir 嘅blog 入面嘅股票, 亦會花多啲時間去睇下其他專業blogger 對股票嘅專業評論,再慢慢決定自己是否跟進。加上早前持有但暫時沽出嘅心水,未來嘅持貨大概會限制於5-6隻左右。

個人操作方面,今日於$2.41小注買回重慶機電, 及於$2.25小注買入北控水務(0371.HK)。

美股昨晚雖然下跌百幾點但香港並無跟跌,可能係之前嗰日個市已經跌早過美市。

保利協鑫升4.2%, 華潤水泥都反彈超過3.7%。三江化工尾市升超過2.6%。全部繼續持有,暫亦未有加注嘅諗法。

今日繼續觀察理文集團。早段跌1%左右,但下午跌幅擴大至超過2.5%,輕微穿咗50天線。個人認為50天線對理文幾重要, 佢有頗長時間係源50天線向上而甚少跌穿。如果今次跌穿咗我會期望佢跌至$9.4。會繼續密切留意。

組合回報上升3%,但仍然下跌7%。

posted from Bloggeroid

2011年5月23日星期一

2011-05-23

今日恆指大瀉超過480點,成交只有600幾億。股票升跌比大概1:10,跌勢廣泛,個人感覺仲有得跌。

早前遭洗倉嘅保利協鑫上星期五反彈3%後今日又跌7%。強勢股東岳洗倉未完,報章唱淡後再跌10%。太陽能股卡姆丹克跌6.7%。個人觀察嘅股票只有內需股如銀泰,利邦上升。華潤水泥今日都上升但似係反彈居多。

上星期沽出套利嘅重慶機電今日繼續跌至$2.4水平, 開始重返之前嘅買入價,會於$2.4開始收集。

理文今日跌1%至$9.9。會繼續觀察係咪繼續下跌先再決定會否再次買入。

三江化工跌超過2%, 仍然未有反彈,動力非常弱。

聯塑繼上星期大插11%後今日反彈2%,但好可能未跌完,睇定啲先決定會否買入。

連日下跌難免令人覺得熊市嘅來臨,等個人偏向認為係一次比較深嘅調整, 但未有完整上升勢頭時入市都係以保險穩陣為重。

組合回報因手上既三江及保利協鑫繼續下跌, 再跌2.5%

2011年5月20日星期五

止血

今日相信係好多追blog 人嘅記念日,好多曾經強勢嘅股票都被洗倉。聯塑被調低評級後單日大瀉11%。東岳跌6%,三江化工繼續下跌3%,華潤水泥曾跌超過3%最終跌約2%。銀泰跌3%。但涯沽多日嘅保利協鑫喺高盛,野村等3間大行同時唱好下反彈超果4%。

眼見大量中資股被輪流洗倉,雖然自己反應太慢,但因為自己組合內嘅股票大都受影響,無奈要大幅減榜。趁反彈今早於$4.25沽出一半保利協鑫,另一半暫時持有,再觀察反彈力度如何。

於$2.5沽出重慶機電,微利。
於$10.06沽出理文集團。獲利大概12-13%。雖然佢一直位於上升軌,亦唔係中資股,但現在風頭火勢,而佢亦都好似想向下嘅感覺,都係套利為上。

此外亦於$12.8沽出銀泰百貨,獲利7%

而家仍然持有少量三江化工, 保利協鑫及華潤水泥。近乎清倉。

組合回報繼續下跌至-9%。雖然係好差, 但現金多咗, 心理上反而唔會咁用容易俾個市影響,可以客觀啲觀察個市!今日沽出嘅股尤其係理文都係好股,當時機適當回再次上車。

2011年5月19日星期四

大出血

今日於$2.85 沽出一半三江化工止血。

保利協鑫今日重挫10%!!! 無錯係10%。做左死牛所以仍然持有。呢一刻心情好矛盾,沽出就無左一大舊錢, 持有唔放又唔知跌到幾時先肯停。學英哥話齋,咁嘅市多做多錯, 一係以快打快用期權, 一係以慢打快放响到唔理幾個月。基本上係選擇咗後者。但要放低完全唔理其實好難!

有時又會諗點計唔止蝕!自己一向用7%止蝕, 今次跟大隊睇好呢隻股票本來冇問題, 問題係自己入市嘅時間一定冇cup sir 或其他大戶咁靚。當佢已經有一定升幅時先跟入,其實值博率已經降低, 風險亦相對提高。其他高手們去到呢個階段止蝕或止賺都一定會比我而家嘅情況好。 雖然而家仍然係帳面上嘅損失,但心態上我已經當佢係realised loss.

組合內其餘嘅股票只有理文上升3%同銀泰微升0.15%, 其餘全部下跌。

組合回報今日下跌2.5%。又變成負回報。


2011年5月18日星期三

曙光初現 + 肉酸操作II

今日早段見東岳跌得好急, 恐怕有類持保利協鑫同三江化工嘅沽壓出現,急忙將早兩日買入嘅貨沽出。點自之後V型反彈倒升2%收市,更高於我之前嘅買入位!只怪自己太心急,太心急買入又太心急沽出, 兩頭唔到岸!果係多做多錯。自己水平唔夠,要深刻反省!!

恆指今日終於收23000樓上,但成交仍然只係得600億左右。保利協鑫初段上升但近中午開始倒跌, 收市跌超過2%,成交頗大, 睇黎仲又得跌。

三江今日比較平穩,跌 0.7%, 但仍未走出深切治療。

銀泰繼續強勢, 大股東配股後連升兩日, 今日再成超過4%

理文繼續上升1.6%但成交量比較細, 繼續持有。

華潤水泥微跌0.1%, 成交縮減. 重慶機電升近0.8%, 繼續持有

受肉酸操作拖累,回報只係微升0.7%

2011年5月17日星期二

驚濤駭浪第二日 (2011-05-17)

今日於$8.7小注買入東岳 (0189.hk)

又係驚濤駭浪嘅一日。保利協鑫回穩左一日又再次被狂沽。今日大成交跌近8%。但暫時唔會放住,始終响咁波動嘅時間真係多做多錯,驚自己把持唔住放完又買, 買完又跌,所以都係睇定啲。好次三江化工尋日跌 7%今日都喘定。抱同樣心態希望會早日回穩。

銀泰百貨昨日大股東配股大跌後今日反彈超過3%, 成交亦配合, 仍然持有。

華潤水泥亦有反彈,升1.8%.

三江化工喘定微升0.3%,但成交細, 唔排除回繼續下跌。

重慶機電昨日大跌後今日冇上落, 暫時冇野做.

理文落實分拆手袋業務,但股價略為下跌0.1%。分拆手袋業務應該利好理文股價。近日風高浪急理文都下跌不大, 睇下有冇機會添食。

組合回報今日下跌近0.9%, 亦變成負回報..真係要少少時間去接受呢個現實.

2011年5月16日星期一

驚濤駭浪的一日 (2011-05-16)

恆指今日跌316點, 1.3%, 股票升跌比例大概1:3, 成交唔夠600億. 但好多之前勢頭好好既二三線股大大力下跌. 個人組合內既股票全部向下, 除理文集團微跌0.1%外, 其他股票下跌幅度很驚人. 但今日無任何操作, 暫時做左死牛!

理文集團今日曾經是組合內唯一上升既股票, 但收市都要微跌0.1%, 但暫無損向上趨勢.

銀泰百貨有股東於配售8000萬股股份, 股價下跌4.7%, 成交量有成1億股. 如果扣除配股數量成交大概係2000萬, 比平日既成交只係略大, 希望佢好快可以回穩.

重慶機電下跌4.7%, 華潤水泥跌3.3%, 成交量不大但係技術上兩股都似係開始向下, 要加倍留意

保利協鑫今早開市係上升但之後不段向下, 最終又跌4.5%, 成交一般.雖然有雙頂危險, 上星期又做左d好肉酸既操作, 會再觀察係咪要減持.

全日表現最差既係三江化工, 下跌7%!!!!!! 理論上已經超過我既止蝕位, 應該要斬纜, 但大家都似乎想睇定啲,咁我都跟大圍,但其實自己都驚驚地, 始終自己嘅買入價未必有其他師兄咁靚, 當人地係賺少啲嘅時候我已經係虧損中, 雖然只係帳面上嘅事,但心理壓力唔細,所以都幾掙扎!!

組合今日大挫超過4%,回報接近零, 係非常痛嘅一日!

posted from Bloggeroid

2011年5月14日星期六

肉酸的操作 (2011-05-13)

5月12日保利協鑫大跌4.6%後昨日繼續下跌, 一度跌至$5樓下, 朝早見唔對路所以係$5.12減持一半. 不過其實當時都驚自己做錯決定。 午市開始後佢真係掉頭回升, 心諗3800應該係一隻優質股,冇理由咁樣放走佢,所以樣衰啲都要喺$5。35再買入。收市只係微跌0。4%。中間蝕咗咁多價位同兩次手續費,諗番都覺得 真係多鬼餘,只怪自己定力吾夠先被震出。應該好似英哥話齋,要沉着應戰唔好自亂陣腳。好明顯自己EQ唔夠,今次嘅操作 真係要引以為戒!!

恆指尋日大上大落,波幅超過400點,心血少啲都唔掂!好多股票都跟住個市上落, 除3800外,三江化工尋日都曾經大跌超過5%,曾經跌至$3樓下,埋單跌2。2%。成交比較大,沽壓可能未完。但基本因素冇變暫時會繼續持有。

華潤水泥亦曾經跌2。5%但又回升,收市只係跌唔夠0。7%,成交亦細,繼續持有。

其他持股就上升。銀泰百貨升超過1。7%但成交薄弱。理文曾經升番上$10水平但收市前回番好多,只係升0。3%,成交亦唔顯著。但個人認為技術上理文處於援慢上升。


重慶機電全日橫行,成交量普通,整體黎講都係橫行整固。

組合經歷咗非常肉酸嘅一日,回報下跌0。9%。

2011年5月12日星期四

2011-05-12

今日無任何操作。

下午公司要上"反貪腐"堂, 3小時嘅課堂令我差唔多整個下午市都睇唔到,上完堂都已經收市。就係因為咁所以令我錯失止賺保利協鑫嘅機會!保利協鑫今日大插4.6%,成交亦唔細,有網友覺得可能營造緊雙頂,所以先走為敬。佢今日公佈季度業績, 首季多晶硅產量升90% 均價升24%. 照計唔算係壞消息, 但見光死經常發生. 另外因為個人覺得沽壓唔細,如果收市前見到咁嘅情況我應該會減持保住利潤。而家唯有睇聽日環境再決定。

其他持保除理文微升0.5%外其他全部下跌。重慶機電及華潤水都跌超過2.5% 。但成交量細, 應該係跟大圍調整居多. 其餘嘅跌0.2%-1%不等。銀泰繼昨日尾市大插今日有回穩嘅跡象.

恆指今日跌210點左右, 成交縮至600幾億。睇黎市場氣芬真係麻麻。大笨象季度業績又唔係咁靚, 可能暫時都係冇運行。如果個市有機會調整至22800附近, 我會選擇沽出部分股票保利。

組合今日下跌1.6%

2011-05-11

今日無任何操作。

三江化工今日大跌超過5%,暫時未知乜事。

銀泰初段一度升3-4%但後段大回至幾乎無升跌, 明日再決定要唔要止賺,正所謂大家所講嘅"花開堪折直須折"。

保利協鑫曾下跌超過1%,但之後又有人推上2%,收市升2.9%, 繼續持有

組合今日下跌 0.16%


2011年5月9日星期一

2011-05-09

今日沽出天能動力及中國龍工, 換入華潤水泥(1313.hk), 買入價$7.53.

恆指今日升176點, 成交縮至570億, 股票升跌比例大概 7: 4.5, 成交量少而且唔全面. 但係8連跌下太多好股下跌, 今日強勢既股票先行反彈, 而組合內股票除天能動力及中國龍工外全線上升.

天能動力再下跌1.8%, 無奈止蝕. 中國龍工雖然只係雞仔注, 但下跌已多都係先行止血.

保利協鑫連跌4日後今日強勁反彈, 收市升9.3%, 美中不足係成交量細, 期望佢繼續爆上.

華潤水泥及銀泰同樣以大成交升近3.7%,  走勢良好. 華潤水泥之前曾沽出止賺. 今日再入既價比上次既止賺更低, 希望贏面可以大d.

理文今日升近1.5%, 成交一般. 銀泰百貨升近3.7%, 成交亦近隨股價上升, 兩者都繼續持有

三江化工升近1.2%但成交很細, 暫時係橫行, 但整體趨勢仍然向上,  繼續持有


近日的幾次買賣以已經令持貨由10隻減至6隻. 重組大概完成. 現持有:

理文集團
銀泰百貨
華潤水泥
保利協鑫
重慶機電
中國三江化工



今日組合回報升近2.3%.

2011年5月6日星期五

2011-05-06

今日減持天能動力,將資金換入保利協鑫,買入價$5.12。另外加注三江化工,買入價$3.34

恆指連跌8日,可能有好多人覺得個市好淡。但好似英哥話齋, 看淡要趁早,看好都要趁早。雖然未知見底未,但將資金集中火力落幾隻強股係我早前嘅目標。而家係一個篩走弱股嘅時候。

今日天能動力仍然好弱, 繼續跌超過2%。但我未完全睇淡,所以只係減持而冇全沽。

中國龍工更弱,今日再跌1.4%。暫時冇眼睇。

保利協鑫初段上升但之後冇力兼跌穿$5, 幾乎以為自己燈咗! 好彩收市都企喺$5水平。成交量減少, 希望佢快d爆上.

三江化工今日繼續上升, 收市升2.7%。但成交唔夠大, 仍然係橫行格局.

銀泰百貨最強, 升近4%, 但成交量都係少. 但係而家睇番佢原來係呢幾日跌市其實唔係跌好多, 走勢幾好, 有機會應該會加多一注.

重慶機電同理文今日都下跌。但成交量不大, 似係橫行整固中, 繼續持有

組合回報今日升0.5%。

2011年5月5日星期四

2011-05-05

今日沽出手上剩餘嘅中國南車。今朝再下跌超過3%, 亦跌穿250天線,無奈止蝕。

今早亦如$5.06買入保利協鑫。可惜買入後就下跌至$4.9附近,尾市升番上$5。

港股連跌7日。組合亦唔能夠幸免。天能動力又再下跌2.5%,但成交唔多,暫繼續持有。冇跟cup sir 沽出希望唔係錯誤嘅決定。

中國龍工跌超過6%, 但因為係雞仔注所以暫未沽出,博佢反彈再處理。

中國三江化工同重慶機電係今日曾經上升嘅股票, 但尾市都係冇力要跌番落黎。

恆指跌至23200水平, 連跌7日令好多人身家大縮水。個人嘅回報由跌市前嘅超過8%大跌至3.5%,損失頗大。如果自己所持有嘅真係強勢股,反彈時應該會有唔錯嘅幅度。正因為有呢個諗法所以幾隻比較重倉嘅仍然持有。但大市遲遲唔反彈, 可能仲係等緊亞爺有冇政策出台。反彈之日就可以知道自己嘅貨係咪強勢股。

今日回報下跌1.5%。又一痛苦之日。

posted from Bloggeroid

2011年5月4日星期三

2011-05-04

今日減持少量中國南車。

恆指今日下跌300多點,9成股票下跌, 二三線股更加係重災區, 下跌3%以上嘅股非常多。

持股亦未能幸免。除重慶機電上升外全線下挫。中國南車更大跌超過6%,成交亦較上日急升,短其應該冇運行。明日如果反彈應改會在減持,等待時機再入市。

天能動力亦大跌,但尾段收復唔少失地,只係跌少於1%, 繼續持有。

中國三江化工初段升超過2%,但下午都要跟跌。仍然持有。

觀察名單中嘅保利協鑫亦跌唔住淡友攻勢下5%。曾經心動想買入,但近日個市真係太淡,都係忍忍手睇定啲先。

今日回報下跌2.2%。

posted from Bloggeroid

2011年5月3日星期二

2011-05-03

今日沽出莎莎, 微利。

拉登被殺, 美股期貨飆升, 但其實對個市嘅實際刺激非常細。今日港股就展轉下跌80幾點收市。

持股方面, 天能動力同中國南車大跌,另組合回報今日下跌超過5%。但兩股成交並唔大, 大危機應該未有,不過好可能要涯價重慶機電連跌多日後今日終於回升, 兩股都升近2.5%,但成交不顯著, 短線仍未走出危險期,繼續觀察。

沽出莎莎後暫時增持多少少現金,暫時未有入貨嘅選擇。不過就算會入市, 應該都係會選擇增持手頭上已有嘅股而唔會入一啲自己冇嘅貨。始終資金唔多,而家嘅貨都係過於分散。

posted from Bloggeroid